The last goodbye!!

Aaj pehli baar, mujhe woh chamak, woh khushi uske chehre pe nahi dikhi, jo mujhe dekhte hi hamesha aa jaati thi....

Kuch maayusi si thi, uske chehre par...

Kuch paani sa tha, uski aankhon me...

Mai samajh nahi paa rahi thi haalaat ko,

Chote se dil me mere hadbadi si machi hui thi,

Furteele kadam mere, jaise zameen ko kas ke pakad ke jam chuke the.....

Hichkichate hue, kuch kadam maine aagey badhaaye..

Mere badhte hue kadmo ko dekh kar, kuch woh bhi aagey aaya

Dekh paa rahi thi, uski hairaan pareshaan soorat ko,

Dekhna chahti thi, uske gol frame ke peeche uski aankho ko,

Kuch paani sa tha, kuch khaali sa tha....
Saansein upar neeche hone lagi meri,
Kaise na poochti, ab khatre me thi yaari hamari,
        ''Kahan... kidhar jaa rahe ho''??
Waise toh nazre na churaai thi usne mujhse kabhi, par us roz mujhse aankhen milaane me use thodi mushkil si ho rahi thi....
Apne pairo par apni nazre gadaaye, woh khada raha......
Haklaate hue jawaab aaya,    
                       '' Nainital''
Mai poochna chahti thi usse hazaaro sawal, 
Bata dena chahti thi, use apne dil ka haal....
Shaayad zubaan meri jam si gayi thi,
Aankhen meri tham si gayi thi,
''Kya jaa raha tha chorr ke mujhe??''
''Kya waapis aayega??''
''Kya mujhe bhool jayega??''
''Kya , best friend wala woh promise itni jaldi toot jayega??''
"Kya.... Kya..''
Kya kehti, bas nam aankhen liye dekh rahi thi....
Apni saari pockets woh ek ek karke tatolne laga, shaayad kuch khoj raha tha....
Kuch der dhoondne ke baad, usne apna woh ''lucky pen'' nikala, jise woh kabhi kisi ko haath bhi nahi lagane deta tha....
Wo pen usne apne nanhe haatho se mere haatho me thama diya...
Jin aansuon ko woh 9 saal ka ladka, lagatar rokne ki koshsish kar raha tha, woh aakhir me uski aankhon se aazad ho gaye...
Bina kuch kahe, uski aankhon ne sab keh diya...
Maine kass ke uska haath pakad liya, jaise ab kabhi chorna hi nahi padega....
Jaise mere rokne se, woh ruk jayega....
Aur, aur usne bhi utni hi mazbooti se mera haath thaam rakha tha.....
Baarish ki halki bauchaar jo mujhe bhiga rahi thi, woh ab boondo me tabdeel hone lagi....
Par mujhe kahan padi thi,
Mai pagal toh bas apne dost ke saath khadi thi...
Utne me hi ''HORN'' ki aawaz aayi,
Ab toh yaar, jaane ki ghadi aayi...
Uski maa aake, usko le jaane lagi,
Meri saansein, ab siskiyon me badalne lagi...
Mere haath ki pakad ab dheeli padne lagi,
Meri dosti ab shaayad kamzor hone lagi....
Aakhir tak mud mud tak dekh rha tha, 
Mera pyaara dost, ab bilakh bilakh ke ro raha tha...
Gaadi me woh baith gaya, dhadkan meri tezz ho gayi...
''Rok lu kya'' , khud se hi pooch rahi thi,
Us lamhe me, badi majboor si ho gayi thi...
Mai peeche khadi use jaatey hue dekh rahi thi....
Raftaar pakad li ab us gaadi ne..
Meri geeli aankhen jahan tak dekh paa rahi thi, wahan tak nazre gadaaye use ek-tak dekhti rahi..... 
Bas dekhti rahi.................



                                                                       - Priyanshi Parmar