First Date

Us subah woh bina ubaasi liye utha, shaayad pichli raat woh soya hi nahi tha, phir aankhen malte hue kuch do minute ke liye apne bistar ke sirhaane se tik jaata hai.....
Kal raat woh soya nahi.... kyunki kal raat kisi ke khayalo ne use jagakar rakha tha.... 
Us ek text ne uski poori neend ujaad kar rakh di thi...
Dil ki dhadkano ne toh jaise toofaan mel ki raftaar pakad li thi..

Aur ''dimaag'' , yeh bechaara toh ab kisi kaam ka nahi bacha tha, 
Jo ladki uske khwaabo me aaya karti thi, kal raat, uske messages me aayi thi... aur aaj subah woh hakikat me use milne wali thi..
Kal raat aakhir is pagal se , bebaat muskuraane wale,kisi ko poori shiddat se chahne wale, apni dil ki baaton ko khud tak mehfooz rakhne wali is bholi si shaksiyat ne apni poori himmat bator ke apne khwaabo ki raani aur apni nayi nayi bani dost se millne ke liye ek darkhwaast laga hi di.....
Is ummeed me ki shaayad kuch dino me, kuch baat toh ban hi jayegi...
Kambhakt use kyaa pata tha, ki khuda us par itna meherbaan ho jayega, aur woh kal subah hi use milne ko bualyegi...
''Let's meet at 12'' ..... raat bhar me is ek text ko 50 baar dekh chuka tha... ab kyunki neend bhi rooth chuki thi, toh bas saari raat kuch chand sawaalo par research karne me.guzaar di..
 Ki aakhir mai usse mil kar kahunga kyaa...
Apne dil ka haal uske saamne bayan kardun yaa bas ek dost ban kar reh jaun??
Uski khoobsurati ke baare me use sab bataun yaa bas ''Uh lookin' pretty" keh kar jaane dun??
Apne dil ke saare raaz uske saamne khol dun yaa bas uske bachpan ke kisse sun kar muskura dun??
Apne dil me ho rahi har ek harkat ko lafzo ke dhaage me piro ke uske saamne rakhun yaa bas ''All good'' keh kar khamosh ho jaun
Uski ankhon ki khoobsurati kaa zikr karun yaa bas unka nazaara lekar wahin tham jaun?? 
''Woh mere liye sirf ek dost nahi'' use bataun yaa bas ''hum achhe dost hain'' itna keh ke reh jaun??
Is poori research me kab subah ho gayi, use pata hi nahi chala..
Jaise jaise ghadi ki tik tik aagey badh rahi thi, uski dhadkan jaise bhaagne ko betaab rahi thi... 
Uske dil ka ek kona us wakt ko bas thaam lena chahta tha, fursat se taiyaar ho jana chahta tha..
Aur doosra kona, bas is waqt ke beetne ke intezaar me tha...
Hadbadi thi usse milne ki, Bechaini thi use dekhne ki...
Shor tyha dil me sawalo ka, Kuch baate thi zehen me usse kehne ki.
Yeh alfaaz bhi toh nikamme the uske, kambhakt zarurat ke waqt kabhi zubaan se bahar nahi aatey the...
Khushi ke us ehsaas ke saath woh us darr ko bhi mehsoos kar pa raha tha...
Aur karta bhi kyun naa,
''Because, this was his first date ever".............


                                                                        - Priyanshi..